Парлумони Тоҷикистон протоколии протоколи мубориза бо ҷиноятҳои кибернетикии СПАД-ро тасвиб кард

Парлумони Тоҷикистон санадеро тасвиб кард, ки табодули иттилоъро дар бораи корбарони Интернет бо кишварҳои узви Созмони Паймони Амнияти Дастҷамъӣ (СПАД) иҷозат медиҳад.

Мансурҷон Умаров, муовини аввали раиси Кумитаи давлатии амнияти миллии Тоҷикистон, дирӯз 5-уми октябр, ҳангоми муаррифии ин санад аз вакилон хост, ки онро тасвиб кунанд, чун ба гуфтаи ӯ, барои таъмини амнияти кишвар муҳим аст.

"Пешгирӣ кардани амалҳои тахрибкорона, истифодаи шабакаҳои интернетӣ барои содир кардани ҷиноятҳо ба муқобили асосҳои конститутсионӣ, амнияти давлатҳо, сулҳ, бехатарии башарият ва ҷиноятҳо дар самти технология иттилоотӣ аз мақсадҳои ин протокол шумурда мешавад", - афзудааст ӯ. ​

Протоколи ҳамкорӣ дар бораи мубориза бо ҷиноятҳои кибернетикиро соли 2014 намояндагони Тоҷикистону Русия, Қазоқистону Қирғизистон, Белорус ва Арманистон дар Маскав имзо карданд. Вакилон гуфтанд, санад заминаҳои ҳамкории хадамоти ҷосусии кишварҳои узвро барои табодули иттилоъ фароҳам мекунад.

Мақомот мегӯянд, аз оғози сол ба туфайли назорати гуфтугӯву суҳбатҳои интернети 8 амали террористӣ дар Тоҷикистонро пешгирӣ кардаанд. ​Абдураҳим Абдулҳасанов, сардори Раёсати назорати иҷрои қонунҳо дар ниҳодҳои амнияти миллии Додситонии кулл гуфтааст, ки барои ин кор маҷбур шудаанд, матолиби шабакаҳои иҷтимоиро баррасӣ ва почта, Вайберу Мессенҷерҳоро санҷанд.​

Ибтидои соли равон Тоҷикистон ҳамчунин эълон карда буд, ки Маркази мубориза зидди ҷинояткорӣ бо истифодаи аз технологияҳои иттилоотӣ ва киберҷиноятиро таъсис хоҳад дод.

Шояд шумо суол ё назаре доред?