Эмомалӣ Раҳмон дар Кӯлоб ба бунёди Бемористони касалиҳои рӯҳиву наркологӣ сангни асос гузошт

Президент Эмомалӣ Раҳмон дар шаҳри Кӯлоб ба бунёди Маркази перинатологии минтақавии Беморхонаи вилоятии клиникии шаҳрӣ ва Беморхонаи бемориҳои руҳӣ ва наркологӣ санги асос гузошт.

Бино ба иттилои дафтари матбуоти Президент, Беморхонаи бемориҳои руҳӣ ва наркологӣ тибқи лоиҳаи иншоот аз 4 ошёна ва таҳхона иборат буда, масоҳати сохтмони он 5658 метри мураббаъро ташкил медиҳад.

Дар иншоот барои табобати бемориҳои равонӣ 80 кат ва барои табобати бемориҳои наркологӣ 40 кат ба нақша гирифта шудааст.

Дар тарҳи ошёнаи таҳхона дармонгоҳ, озмоишгоҳи клиникӣ, бахши ташхисӣ ва экспертизаи наркологӣ, ҳамзамон Маркази экспертизаи тиббию судии минтақаи Кӯлоб ҷойгир карда мешаванд.

Тибқи ҳисобҳои пешакии мутахассисони Ҷамъияти Саҳҳомии Кушодаи «Корезлоиҳа» маблағи сохтмони иншоот 12 миллиону 680 ҳазор сомониро ташкил медиҳад, ки аз ин миқдор 1 миллиону 440 ҳазор сомонӣ барои таҷҳизоту лавозимоти зарурии тиббӣ равона гардидааст.

Дар рафти корҳои сохтмонӣ беш аз 700 нафар аз сокинони маҳаллӣ ба кор ҷалб мешаванд.

Баъди бунёд бошад, дар ҳар ду иншоот беш аз 500 нафар мутахассисони ҷавони соҳа бо кори доимӣ таъмин мегарданд.

Маркази перинатологии минтақавии Беморхонаи вилоятии клиникии шаҳри Кӯлоб бо мақсади баланд бардоштани сатҳи хизматрасониҳои тиббӣ ба модару кӯдак сохта мешавад.

Марказ аз таваллудхона, шӯъбаҳои бемориҳои навзодон ва кӯдакона, наҷот, бемориҳои занона, ҳуҷраҳои махсусгардонидашудаи табобати оҷилӣ ва бахшҳои ҷарроҳӣ равона гардидааст.

Иншооти сохташаванда аз 3 ошёна иборат буда, масоҳати ҳудуди он 7 ҳазор метри мураббаъро ташкил медиҳад.

Copyright © 2015 TojNews

Шояд шумо суол ё назаре доред?